VISITA GUIADA Á EXPOSICIÓN: NO COLO DA ESPERANZA. MAÑÁ XOVES 16 ÁS 13:00 HORAS NA SALA DE EXPOSICIÓNS DO SALÓN DE ACTOS

O FOTOXORNALISTA FELIPE CARNOTTO VISITA MAÑÁ XOVES DÍA 16 ÁS 13:00 HORAS A EXPOSICIÓN DAS SÚAS FOTOGRAFÍAS CHAMADA NO COLO DA ESPERANZA.

– As imaxes tomadas por Felipe Carnotto na ruta dos Balcáns e protagonizadas por familias sirias amósanse na Sala de Exposicións do Salón de Actos

 

Felipe Carnotto visitará esta mostra o xoves ás 13:00 horas e dará unha charla na que explicará a súa experiencia ao realizar estas instantáneas realizando unha visita guiada pola exposición. A esta cita queremos convidar a todas as persoas afeccionadas á fotografía (en especial á fotografía social) e/ou sensibilizadas coas inxustizas e as desigualdades.

‘No colo da esperanza’ poderá visitarse ata o 2 de xuño na Sala de Exposicións do Salón de Actos, de 18 a 21 horas. As exposición foi realizada en 2015 na denominada “ruta dos Balcáns” polo fotoxornalista Felipe Carnotto. As fotografías están protagonizadas principalmente por rapazas e rapaces que foxen da guerra en Siria canda as súas familias, na busca dun futuro próspero en Europa. A forza das imaxes pretende poñer o foco nas inxustizas que están a acontecer para que milleiros de persoas abandonen os seus fogares e camiñen en ringleiras durante horas, cruzando países como Turquía, Macedonia ou Serbia na procura de refuxio, coa esperanza de vivir en paz.

O fotoxornalista

A relación entre Felipe Carnotto e o Fondo Galego bota a andar en 2014, cando o reporteiro gaña o concurso Imaxes con Fondo II, no que o premio era unha viaxe a Nicaragua para retratar a realidade do país e os proxectos alí apoiados. Como freelance, o fotógrafo de orixe brasileira afincado en Vigo ten publicado en xornais como The Guardian, Der Spiegel, Financial Times, El País ou a revista Luzes. En 2017 fíxose co recoñecemento á Imaxe do Ano no prestixioso certame Estação Imagem e no mesmo ano acada o Galicia en Foco.

Print Friendly, PDF & Email